炎鳥羽

Open Now

Now Closed

尖沙咀樓上店竟然令人置身日本一出lift已經見到清新和風佈置，令人好舒服，今次店員安排我地2人坐bar枱，更清楚地見到食物製作嘅過程，師傅嘅用心絕對値得欣賞。本來無諗住食廚師發辦，但見到價錢合理又有唔同種類嘅燒物揚物，最適合有選擇困難的人，所以要一人前，另外加小食share。最先到嘅當然係前菜然後就開始心心眼：刺身！肥美又厚，色澤均勻，非常新鮮，連平日我一般嘅八爪魚都好清甜。私心推介：明太子蛋卷、明太子雞翼真材實料，鮮味香口，唔係只得幾點襯色，蛋卷軟滑厚身，口感帶點鬆軟，雞翼漲卜卜好可愛！咬入去超過50%係明太子，呢種「喧賓奪主」我絕對支持😍揚物：如果你唔叫廚師發辦，我都會推介海膽天婦羅！ 外皮好薄，海膽微暖更加軟滑，鮮味突出，唔需要其他調味已經味道豐富有層次。燒物仲有邪惡的燒雞皮，朋友表示薄脆不油膩，牛肉亦吸引，日本茄子、冬菇，都係水平之作。日式燒物其中一樣令人喜歡的，正是不用強烈的調味更顯食材的特點。甜品：黑芝麻雪糕，香滑滿足。服務幾好，店員主動加茶同收碟，揚手好快有人過黎，每上一道菜會為你介紹日本人地道食法。