申子居酒屋

Open Now

Now Closed

今日約咗朋友，一早訂好位食日本菜！ 揀咗最角落嘅位置，牆上更有一啲立體錦鯉，好有特色呀。因為預先訂位 6:30pm前入坐，一人送咗一件【和牛壽司】，質素高喎。 有擺盤，隨便影張相都覺得靚呀。叫咗杯【荔枝乳酸梳打】，香甜冰凍，大大杯！【申子海膽和牛燒】選用鹿兒島A4和牛，顏色紅嫩，滿滿雪花紋。先揀好和牛熟成，店員就會即席烹煮，先炙燒一下和牛，再放上蘭王雞蛋同埋日本珍珠飯攪拌，每捲一下又用火槍火炙，最後加上特調和牛豉油、黑魚籽同埋海膽，一人一件，油脂滿溢，份外滋味。【汁燒蒜片牛柳粒】牛肉粒腍滑，醬汁味濃，夾埋炸蒜片一齊食，正！ 不過份量偏細。【洋風雞肉卷】做得出色，雞肉紮實彈牙，最好味係雞皮，少少香口又帶點爽滑，食咗感覺都唔肥膩。【極上蟹膏蟹肉燉飯】一揭開蟹蓋就見到好多蟹籽、蟹膏、蟹肉，撈埋一齊食，鮮甜蟹味突出，三重滋味！最後叫多個【鮮蟹肉粥】，冬天食返啲熱辣辣嘅嘢，成身都好暖。有好多蟹籽，脆卜卜口感加上綿滑粥底。