媽咪雞蛋仔 (Closed)

平時日頭行過都勁多人，夜晚經過見到冇乜人，特來一試。本身諗住試原味，但係見到佢有抹茶又有朱古力咁，好難抵抗，叫咗個抹茶朱古力雞蛋仔。收銀阿姐基本上全程臭面，唔知係生意太好做到心情唔靚，定係天生RBF。不過食雞蛋仔唔係食服務，如果整得好食，就算俾佢問候埋屋企人都冇所謂。等咗十分鐘，終於嚟喇！登登登登！成塊係爛嘅。偶有失手冇所謂，失手就重新整好先俾個客。咁到俾得出手，基本上連基本嘅商業道德都冇。可能有米芝蓮加持，唔愁冇客，所以垃圾都可以俾人。塊野連一粒完整嘅雞蛋仔都冇。味道嚟講，朱古力得個甜字，亦冇乜抹茶味，外皮唔鬆亦唔脆，基本上係劣食。香港好多做食肆嘅人，對食物冇要求，咁好彩得到個米芝蓮加持，就當啲客係死嘅，反正都做到手唔停。咁嘅態度，唔怪得咁多人會覺得香港冇啖好食。