1
嚟到深水埗呢個平民地方搵食,阿肥話要帶我去一間好好味嘅<維記>品嚐,見佢裝修簡陋,但人流極旺,好似啲地踎大排檔咁款,好彩我今日都係casual wear,唔怕污糟,將貨就價喇~
望一望佢哋有咩嘢食賣,原來主打都係好似早晨套餐咁嘅牛肉麵呀豬潤麵呀...餐肉/火腿+雙蛋等等,亦有米粉或通粉選擇,眼見大部份食客都係叫咗豬潤米咁,但係我由細到大都唔食內臟嘢,而嗰啲早餐款式我今日又冇乜feel食(平時番工仲食唔夠咩?!)所以我就俾一個叫做咖央西多士嘅物體吸引住喇。
咖央多士就聽得多,咖央西多士又真係第一次試,同阿姐落完單見呢度啲阿姐完全唔需要用紙筆寫低,自己心諗「好,就睇吓你哋會唔會漏單!」幾分鐘之後上菜速度超快,阿肥叫咗個牛肉腸仔通($35蚊),我就當然叫咗個咖央西多士($19蚊),再加多杯凍飲,全部正確冇漏單,阿姐的確好嘢!~
牛肉腸仔通($35蚊),阿肥話呢度啲牛肉好似滑牛咁,又滑又腍好好食,同埋佢個湯底應該都係入味嘅嘢嚟,所以吸引咁多人慕名而來。
咖央西多士($19蚊),我呢份西多士嚟到之後個賣相雖然唔多討好,不過見佢用蛋汁蓋住成份多士嚟煎香感覺都幾特別,由佢呈現嘅微黃色外表睇嚟炸嘅時間估計應該唔會好耐,所以入口都係一般鬆脆,但咖央內餡夠甜又夠多,食落去都令人滿足,確實唔錯
