。經訂位app book左枱，過左一輪就收到email confirm booking。附上當日set menu，亦都講明當日只供應此menu既食物，睇過菜式都算啱食就confirm啦，都預左呢啲節日係會出呢啲餐黎賺你錢。Confirm booking仲要先付訂金，以免你果日甩底佢賺少左。
當日7：30準時去到，係樓下等左一陣，張枱先ready。
餐廳都算幾大，連埋地下總共三層。地下有bar枱同埋幾張大圓枱，有梳化幾舒服咁。我地被帶到上去二樓，相對地就坐得比較逼，大部份都係二人枱(可能係當日特別set成咁)，枱與枱之間既空間唔太多，大聲少少都聽到隔離講乜，櫈亦都唔係太好坐。不過餐廳環境確係幾靚既，落地玻璃窗前仲放左啲植物，裝修有啲復古。枱面都有放左啲花瓣，蠟燭，幾有氣氛
。既然已經係set menu，理應都唔需要order既，不過待應都有循例過黎介紹下menu，同埋問下你嗌唔嗌酒，但都等左成十分鐘先有人埋黎。
過左一陣，先放低一籃包，包幾軟熟，有兩款醬配，其中一款蒜蓉蛋黃醬幾好味
。食完個包，生蠔就黎喇，生蠔幾新鮮。直到呢度，一切都正常既…跟住再有下一道菜，已經係15分鐘後…而且開始冇跟menu順序上喇…下一道送上既係小食，煎香腸。腸本身幾惹味，但煎過左火，個底燶左食唔到。傍邊果片蕃薯，正好中和返腸既鹹，呢個配搭都唔錯。隔左一陣，另一個前菜，炸芝士波到左。一咬開熱辣辣既芝士流出，係好食既
。又隔左大概十分鐘，再上埋另一道小食，香蒜煎蝦，蝦好新鮮，爽甜，只加少少調味就好好食，全晚最好食都係呢個。個蝦食完我地又等下一個菜。呢個時候發現我地食晒啲小食仲有個前菜係未黎…
然後…我地再等左半個鐘都未再有野食…
開頭都不以為意，諗住咁full出菜可能慢啲…但再望下鐘，訂枱既時候講明兩個鐘交枱，再等又食唔切，咁就開始追喇。此時先發覺，待應得果三個，睇晒成層忙到飛起，好不容易先等到個人理下我地，得到既係例牌回應:煮緊，黎緊。唔知佢有冇真係幫我地跟啦…之後又等左一陣都未有，但眼見遲過我地入黎既都食緊我地未食既菜，又忍唔住再同另一個待應該追下啦。得到既回應都係一樣，完全沒有唔好意思，我都開始有啲火，同佢講我地等左好耐
。跟住見到個待應拎碟燒豬出黎，仲以為係我地既，點知佢行左去第二度，又發現唔係果枱既。睇黎佢地出菜都出到亂晒。終於送到黎我地枱，我順便問返佢仲有個前菜未到，佢先恍然大悟，今次佢有即刻幫我跟。
其實到呢個時候，已經冇乜心機食
。個燒豬係幾嫩滑既，好多肉汁，個皮可以再脆啲。不過主菜黎講，佢份量真係細左啲，每人兩啖就食完。再黎返個前菜，吞拿魚，我地兩個都唔喜歡，醃得太酸，下面個汁又好酸
。然後又等左一陣，終於，最後個主菜都黎埋。中間見到啲待應好忙，都費事再追，相信好多枱都追緊。而佢地亦都忙到水都唔記得幫你加。墨汁飯賣相不錯，但略為鹹左啲，食落亦冇乜墨汁既鮮味。
食埋呢道主菜，已經成十點幾。拿拿淋叫佢起埋個甜品，唔係驚尾班車都趕唔到。
等緊甜品既途中，我地留意到好多枱遲過我地入黎既，枱面都係冇野食，係度等緊。另外，相信因為好多枱都好似我地咁樣，冇野食，遲左交枱，變左下一輪book左枱既就冇枱，等左好耐先上到黎，唔知佢地食完要幾點呢
。實在係不能理解，已經係全場都食一樣既野，點解出菜都咁慢呢。當晚full booking但成層主要都係得三個待應，根本serve唔切咁多枱客，出菜又係出到亂晒。真係唔expect比左更貴既價錢，但得到既service係咁差，要係咁追先有野食，完全破壞左個情人節。食物味道係ok既，但個份量偏細，性價比好低。
1
