菜單真係好豐富 烤餅同麵包都有好多款 根本唔識揀 就隨便叫
食印度菜點少得嗌咖哩 所以隨便揀咗款海鮮配咖哩 員工係印度人 要用英文點菜 但好彩有中文菜單 嗌完嘢食即刻捧咗一盤脆餅俾我哋 初初以為喱個係我哋嗌嘅印度烤餅 原來唔係 係叫脆餅籃脆餅籃入面有脆薄片同蝦餅 配埋個好深綠色嘅薄荷醬 味道幾特別同幾好味 係好似好多香料打勻而成嘅醬 我都唔識分係咩香味 當零食咁食都幾過癮
海德拉巴羊腿香飯
喱個飯勁正 面頭有層烤包咁 佢會幫你𠝹開同拌勻 包下就係新鮮熱辣嘅羊腿香飯 佢幫我哋煎皮拆骨
剩返腿骨 望落已經流口水 食落更覺出色 真係好香肉同香草味 係好中東嘅風味 啲香料充斥住我嘅味蕾 帶有一點點辣 但同行友人唔食得辣 佢話辣到食唔到 雖然好惹味 其實個店員已經喺落單時問咗要咩辣 我哋係揀最細嘅bb辣 而出嚟嘅效果係我認為辣得好適中 調較得好好 令到成個飯層次感出咗嚟 真係好好味 而且羊腿肉質好稔身 又嫩滑 仲好大隻 又唔肥膩同唔羶 因為香料已經完全掩蓋種羶味 真係好正 下次幫襯係我必嗌之選 佢仲配埋個乳酪俾你 可以撈埋同飯一齊食 真係好有特色同惹味
印度烤餅
喱個烤餅係好似麥香麵包感覺 熱辣辣 好軟身 食落好香麥味同麵粉味 好好味 拎嚟配咖喱一流
蝦咖喱
咖喱味帶辣 印式咖喱帶辣係正常吧 我都係覺得只係少少辣作調味咁 同行友人話喱個係無咁辣 佢食得到 大家都覺得好好味 啲蝦唔單止表面沾滿哂汁 入面都入到味 肉質亦係彈牙 好新鮮 喱個咖喱都好出色
整體嚟講 喱間餐廳感覺尚算寬敞 當日食晚餐又無乜人 所以覺得好舒服 好光猛 同藍綠色嘅設計令人好放鬆 食物質素十分出色 服務過皇宮嘅大廚果然名不虛傳 喱個價錢又唔貴 仲俾我哋享受到貴族美食享受 而且食物份量好大份 絕對物超所值 一定會返轉頭再試其他款色 唯一美中不足係佢𠝹開個皮 無問我哋影唔影張相 就開始努力拆肉撈飯
