茶餐廳2.0 (Closed)

和家人外出食飯，原本見到呢個冬日2.0笠笠煲都好想幫襯，不過後尾見到有個小菜套餐竟然有白胡椒蟹，我哋兩個都覺得好耐冇食啦，所以最後決定要小菜套餐，下次先過嚟打邊爐啦。本身小菜套餐係可以逐個小菜計，不過呢個白胡椒蟹就係二人餐，白胡椒蟹以外再加一個小菜，兩碗白飯，一碟清炒時菜和兩碗湯。中菜套餐以為飲中湯最正路啦，點知佢叫我揀嘅兩個都係西湯，結果揀咗香草忌廉蜆肉湯，比較濃嘅香草味，但質感較薄，同埋好似唔覺有蜆肉。重頭戲來了！份量來講就係一隻蟹，切開咗幾件，外皮加脆醬炸左比較香口，蟹蓋都有膏，蟹肉實淨多肉，胡椒味唔算好濃，加上勁多脆米粉，成件事都幾惹味，配白飯就啱啦。另外嘅小菜我哋揀咗菠蘿生炒骨，呢個都好好食，除咗生炒骨之外，仲有菠蘿洋蔥和紅椒青椒等，甜甜酸酸好味好開胃呀。套餐還附送一碟清炒蔬菜，呢碟白菜都炒得好唔錯，新鮮又夠鑊氣。去食飯記得 社交平台打卡，就可以免費將飲品升級做特飲，我呢杯就係芒果碧螺春凍茶，仲有桃膠和杞子，淡淡的芒果味，味道清新得來唔會太甜，都幾好味呀！