漁牧 (Closed)

同公司同事去漁牧食飯，餐廳環境比味道令我留下更深刻的印象，內部以紅色為主色調，中國色彩濃厚，牆身設計非常特別，有多款特色圖案讓人打卡。餐廳裝修亦都甚有格調，又有多個酒櫃，頗有氣派。至於食物就令我有少少失望，雖然餐碟、擺盤、食物賣相都好出色，可惜味道就略為失色。因為人多，所以烤魚都叫咗3盤，分別係誘人麻辣味、回味酸辣味同埋鮮檸檬番茄味。魚就揀咗沙巴龍躉，除此之外，仲有唔少配料可以添加，包括公仔麵、紅薯寬粉、午餐肉、腐竹、芫茜等等，不過感覺就更似部隊鍋多啲啦！沙巴龍躉肉質彈牙，口感係幾唔錯嘅。誘人麻辣味雖然唔係最辣嘅一款，但辣味有返咁上下勁度，大家都食到滿頭大汗；酸辣味幾開胃；番茄湯底嘅魚食落冇乜味，令我相當失望。而川香口水雞就不過不失，醬料幾好味。九格前菜雜錦打卡一流，味道就普普通通，冇咩記憶點。