晶瑩鮮蝦餃 🥟
飲茶點可以冇蝦餃先？呢度嘅蝦餃大大粒，個皮睇落真係幾透薄，夾起嚟冇穿冇爛，合格！一啖咬落去，入面起碼有兩三隻蝦，幾爽口彈牙，鮮味都夠。不過不失啦，穩陣之選。
味道口感：皮薄蝦爽，鮮味足。
評價：基本功紮實，食得出係新鮮嘢。
評分：🌕🌕🌕🌕🌗
龍蝦湯鮮竹卷 🦞
呢個名聽落幾勁！上枱時熱辣辣，個湯底真係聞到淡淡龍蝦香喎。鮮竹卷索晒啲湯汁，好juicy！入面啲餡料都豐富，唔係得舊腐皮就算。個龍蝦湯底唔算超濃，但鮮甜味係有嘅，幾特別。
味道口感：湯汁鮮甜，腐皮軟滑吸湯。
評價：有心思，味道唔錯，值得一試。
評分：🌕🌕🌕🌕
一口鮑魚燒賣 👑
呢個擺明係呃like呃相機食先嘅點心啦！粒燒賣上面真係有隻迷你鮑魚仔，賣相幾矜貴。鮑魚仔本身煮得算腍滑，唔會韌。下面粒燒賣都幾足料，豬肉加蝦肉，都幾彈牙。成粒食落去，口感層次豐富咗。
味道口感：鮑魚仔軟滑，燒賣彈牙肉香。
評價：賣相加分，味道都OK，試下無妨。
評分：🌕🌕🌕🌗
金珠小雞鹹水角 🐥
嘩！呢個一上枱，成班同學仔（雖然已經唔細）都「嘩」咗聲！個樣真係整到成隻雞仔咁，超級得意，相機食咗好耐📸！炸到個皮外層脆卜卜，入面嗰層糯米煙煙韌韌，個餡係傳統鹹水角嘅味道，鹹鹹甜甜。好食又好玩！
味道口感：外脆內軟糯，餡料惹味。
評價：造型滿分！味道係水準之上，呃like必點！
評分：🌕🌕🌕🌕
豉汁蒸鳳爪 🦶
飲茶嘅comfort food！呢度啲鳳爪蒸得夠晒火候，啲皮入口即化，一啜就甩骨，啱晒我呢啲懶人。豉汁味好濃郁，完全滲晒入啲鳳爪度，花生都夠腍。冇得輸！
味道口感：極度軟腍，豉汁味濃惹味。
評價：水準穩定，送茶一流。
評分：🌕🌕🌕🌕
雪花墨西哥叉燒餐包 🇲🇽🍞
呢個名好fusion！個包面頭有一層脆脆地、甜甜地嘅「雪花」，似墨西哥包嗰種皮。個包身幾鬆軟，唔係實的的嗰啲。入面嘅叉燒餡份量足，甜度適中，半肥瘦叉燒，幾香口。成個配搭幾得意，又幾好食喎！
味道口感：面脆內軟，叉燒餡香甜。
評價：有創意又好食，口感豐富。
評分：🌕🌕🌕🌕🌗
鮮蝦蒜香脆春卷 🍤
春卷炸得金黃香脆，呢點做得好好，而且食落唔會成口油。入面除咗有蝦肉，仲有啲蒜香味，幾香口。不過整體嚟講就正正常常，冇話特別驚艷，不過不失嘅一款。
味道口感：香脆唔油膩，有蒜香蝦味。
評價：不過不失，合格嘅炸點。
評分：🌕🌕🌕
金湯小龍包 🥟
呢個小籠包個名有個「金湯」，上枱時個湯汁隱約見到有啲金黃色。個皮都算薄，夾起嚟要小心啲。一咬開，啲湯汁真係幾鮮甜，唔係死鹹嗰種。肉餡都幾滑。不過不失啦，唔算係食過最正嘅小籠包，但都OK嘅。
味道口感：皮薄湯鮮，肉餡滑。
評價：湯汁係亮點，味道唔錯。
評分：🌕🌕🌕🌗
1
總括嚟講，盈館嘅食物質素高，味道出色，價錢方面大概每位$300-$400左右，對於呢種級數嘅點心宴其實算劃算。選擇呢間餐廳主要因為佢地口碑好，而且旺角交通方便🚇，適合成班同學集合。班導師話呢餐令佢感動又開心，真係完美送別禮🎁！
