王將精點 (Closed)

最近連鎖外賣中式點心鋪愈開愈多，今日俾我係油麻地到發現依間新開嘅獨立點心鋪，係A1出口一出就會見到，裝潢非常中式化，標榜即叫即蒸，而且見到螢幕上嘅點心做工精緻，吸引咗我買黎食~首先介紹佢嘅蒸飯 – 臘腸排骨飯($32)，用荷葉包住蒸，一打開已經聞到陣陣飯香味，排骨好淋又入味，好中意佢唔太肥嘅臘腸，暖粒粒好窩心。我嘅至愛係粉豚豬嘜包($12/個)，係螢幕上見到隻豬仔好得意，估唔到出到黎都係咁QQ。入面係叉燒餡，鬆軟又香口。亦都叫咗其他點心試下，香滑牛肉腸($25)，皮滑餡靚，牛肉餡多到爆。秘製酸汁蒸土魷($26)，土魷上嘅刀絞好巧功夫，而秘製酸汁就更加無得頂，酸得黎係有少少辣，好惹味。王將雞扎($25)，有原隻雞肉、火腿、豬皮，非常大件厚身。P.S. 因為係即叫即蒸，所以可能要等15分鐘以上。