方姐湛江雞 (Closed)

途經此店，忽然想起好少食客家菜，不如一試，於是便食了一個$188的二人餐，店內是出名食雞的，二人餐則有送燉湯、時菜及白飯。平日常食雞，今天二人餐，棄雞，食圍村炆鴨，其實即係南乳炆鴨，南乳味香醬濃，將每件鴨件炆得相當野味，雖然炆得咁入味，但鴨肉一啲都唔霉，鴨肉仍然好實淨，用嚟送飯，真是一流！蒜苖炒鮮魷，平日出街好少食到蒜苗，呢度的蒜苗炒得好爽口，魷魚亦都好新鮮，總括一句：好食！藥膳燉湯，材料都好多，有雞肉、豬肉、雞腳，仲有不同的藥材，一般燉湯的湯面都會有好多油，但呢個燉湯就冇呢個現象，燉湯好香藥材味，飲落好鮮甜，鍾意飲藥材湯的朋友就啱晒啦。飯後啲姐姐仲送咗兩塊炸番薯俾我哋食，外表好似煎釀三寶的炸番薯，啲姐姐話，呢個係要點酸梅醬食先好食，第一次咁樣食炸番薯，食落酸酸甜甜好得意，不過吾點醬，就咁食，番薯都好甜喔！真開心，又找到了一間可以開飯的地方了。