獅叔 (Closed)

多年前都過星馬，印象都開始模糊（除咗肉骨茶），今日黎到呢間餐廳回味一下星馬菜嘅味道。馬來湯肉骨茶喺星馬名物，當然要試。以豬骨同多種中藥材熬成，加入豆卜、金菇等作配料，濃郁帶甘香。我好鍾意食蝦，所以分別叫左燒牛油大頭蝦同蒜虎虾球飯粒呢兩款菜式。前者大蝦好澎湃好吸睛，一上菜已經好香牛油香同焦香，厚厚嘅蝦肉配上蝦膏；後者蒜虎虾球好香口好彈牙，幾有驚喜。另外仲叫左檳城大蝦炒粿條，蝦嘅份量相對少啲，但都好食。粿條煙煙韌靭，辣辣地幾惹味。牛同雞各叫咗一款。馬來奶油咖喱雞，雞肉好嫩，咖哩嘅奶味香濃，但就唔辣；印尼巴東牛肉有椰奶香之外，仲加入辣椒同其他香料，整體上更惹味。甜品方面，叫左咖央蘋果金寶配雪糕同美祿咖央烤吐司，兩者都加入咖央令整體更有特色。個人更喜歡前者，蘋果金寶烤得好靚，配上雪糕幾好食。飲品都幾靚。