牛極 (皇后大道東）

Open Now

Now Closed

除咗銅鑼灣，原來灣仔都開左間牛極，係皇后大道東。晚飯時間經過又黎試吓先。同其他分店一樣，米飯，湯，沙律，水都係自助任食。肉汁有三款，分別係自家製燒肉汁，蒜蓉同辛味芥末燒汁。水係檸檬水。飯我就冇食，旁邊有d芝麻粒俾你自己落。湯係日式牛肉湯，其實有d似羅宋湯，不過完全唔辣，仲俾我揾到少少牛肉片同蘿蔔片。沙律菜係梛菜，有胡麻同柚子沙拉汁自己落，d菜都好新鮮，落胡麻醬冇得頂。我一人食左四大碗！牛肩扒 180g $80我叫左最平既牛肩扒 180g。上枱既時候塊扒外面全熟，入面就未，要自己係塊熱石板上加熱。塊扒都幾厚，我鍾意佢唔肥好瘦但係又唔韌。塊熱石板好勁，要快手切黎食，如果唔係會太熟，都食得好趕下。塊扒上面已經加左少少黑椒粒同三塊蒜片，點燒汁食好味，如果唔係會太乾。呢個價錢有熱辣扒食都抵玩嘅。圍裙都係自助自己攞，一定要攞，因為d汁彈到周圍都係。呢間分店裝修新凈，冷氣足夠，都食得舒服嘅。好彩我早過高峰期到，如果唔係都幾多人。