十八座狗仔粉

Open Now

Now Closed

收工出旺角買埋野都九點幾，行到金魚街聞到成陣碗仔翅味好香，見未食飯，決定買碗火鴨翅試下，睇見門口招牌，見到加埋燒鴨脾好似好正，又飽肚啲，就加多30蚊加隻鴨脾下庄。由於佢話係即滾嘅關係，都要等一陣，唔係即「筆」即有。等等下見有幾個人叫狗仔粉，好似又幾好食，咁好啦，買埋同家人一齊試下，兩碗野加鴨脾盛惠$86。返到屋企，兩碗野仲係熱嘅。個火鴨翅同般碗仔翅都幾唔同，好杰身同埋味度偏濃同咸左少少。成隻鴨脾點晒落個翅到食，個食法都幾新奇，啖啖肉，唔錯！至於個狗仔粉，佢又係唔似一般酒樓湯底，佢係好杰身，好似打左個獻咁，料唔係好多，不過加左辣菜甫幾野味，可惜可能因為浸得太耐，舖糊狀同太淋。總括黎講，火鴨翅比狗仔粉較佳，狗仔粉同樣價錢，我會揀去第二度食油渣麵。