Dazzling Cafe (Windsor House) (Closed)

記得兩年前同朋友第一次試呢到嘅窩夫，一試難忘，今日終於食第二次。由於每人都要嗌一杯野飲，我嗌左仲夏熱帶水果茶，男朋友嗌蔓越莓蘋果茶。水果茶係用茶壺裝，份量好多，都算有兩杯。以往喺餐廳飲水果茶，有唔少都係由香橙/熱情果味，覆蓋晒其他水果嘅味，但呢個水果茶唔會太酸。飲落係蘋果同提子嘅味多啲，清甜！相反，唔推介蔓越莓蘋果茶，飲落好似利賓納，莓嘅味好假，甜得好唔自然。黃金烏魚子蒜香意大利麵，比較重口味。蒜香好易食得出嘅，幾惹味但真心咸。另外份量好少，一個人食都未必夠。好彩仲嗌左個窩夫，兩個人嘅話，嗌$300左右食物已經夠飽，因為甜品飽肚，飲埋杯飲品係好飽。窩夫嘅配醬有士多啤梨醬、煉奶同楓糖漿（？），加埋雪糕、忌廉、士多啤梨同朱古力，口感好豐富！煉奶嘅味好突出，好好味。雪糕都算夠，令到窩夫唔會好乾。重要嘅係窩夫本身都算鬆軟，唔會太重麵粉味。總結黎講幾滿意，一邊食又可以欣賞窗外風景，幾寫意。