花月宮

Open Now

Now Closed

好似好耐冇出街打邊爐，見今日天氣突然間又轉返凍，最適合就係打個邊爐暖下身。好耐之前嚟過呢度食印象中幾好食，嗰度嘅環境真係幾舒服，夠晒大，仲好多卡位添。我哋今晚叫咗鴛鴦湯底，一邊係沙嗲湯底。個沙嗲一上嚟就已經超級香，入面仲要包咗啲鴨血，好夠味，連豉油都唔使點。另一個湯底係桃膠椰子雞湯，呢個湯底都好足料。係開始打邊爐之前仲特登試咗佢啖湯，又真係好甜，而且好香椰奶味。因為鴛鴦鍋嘅關係，佢只係跟咗個例牌份量嘅雞。嗰啲雞煮完之後仲好滑添，呢個湯底係幾值得嗌嘅。然後我哋叫咗個封門柳，上到嚟個顏色唔係好靚，比較深色。不過原來佢係成晚嘅MVP，因為好香牛味，而且仲好腍添。另外嗌咗個鴛鴦蚌，但係佢就唔係太新鮮，所以味道好一般。之後我哋叫咗個餃子拼盤，但係佢今晚冇晒辣子雞餃子，就俾咗兩款重複嘅鳳城餃子，賣相一般。但係每一粒咬開都係有好大隻蝦，而且啖啖肉好彈牙，真係搞不可以貌相。另外佢哋嘅黑松露餃子就冇蝦嘅，但係黑松露味就好香，可以一試。飲品方面，我哋兩個人叫咗一支竹蔗茅根，都分到每人兩至三杯，甜度啱啱好，感覺上又可以清熱氣。兩個人食咗千零蚊，打邊爐嘅話算係咁啦，不過兩個女仔嚟講都夠飽嘅。