Cafe Locomotive Contemporary Vietnamese Cuisine (Wun Sha Street)

火車頭其實以前已經食過，不過就無寫到食評，一直都好記掛住佢既蟹肉湯底，所以今日早收工就揸車落大坑食一食佢啦！

去到大坑剛剛好18:00，平時灸手可熱既錶位仍有一兩個空缺，幸運地泊正無門口錶位，爽！

室內環境同幾年前一樣，樓底高，唔會太嘈雜。

鮮蟹肉湯河

$108

鮮茄牛腩河

$82

即刻叫返兩碗湯河醫醫肚！蟹肉湯底依然非常惹味鮮甜，啖啖濃湯，又真係有蟹肉食到，湯底贏曬好多間港島越式餐廳！大蝦好爽甜，如果多隻就更加好，可以Share。牛腩就煮得非常適中，夠淋身唔痴牙，但又無煮到散開曬。

馬拉盞炒通菜

$78

炒菜對比中式大牌檔，稍缺火喉，不過仍然香辣惹味，通菜唔老無渣。

米紙卷（軟殻蟹拼牛油果）

$78

米紙卷都值得一食，平時我唔食牛油果，不過咁樣混合一齊又意外地味道調和，夏天食都幾舒服。軟殻蟹唔洗多講，甘香脆口，想食多幾舊。

越南滴漏咖啡（熱）

$32

越南滴漏咖啡（凍）

$36

最後必定動作：一人叫杯凍熱越南滴漏咖啡！煙薰味香濃，再加濃滑煉奶，一飲即刻上曬電。

值得一讚既細心位，就係凍飲冰底係厚實碎冰，能夠有效吸收同冷卻滾熱咖啡，唔會好似市面其他越南餐廳咁，一撞熱咖啡落冰底就滿瀉或者冰塊𣊬間溶化搞到杯咖啡稀釋曬咁。

埋單每人$200幾蚊，價錢唔算貴，個人認為物有所值！下次條癮起再食過！