烏蠅館 (Moved) New Location

來自雲南嘅酸辣米線，打入香港好多年，除咗各大呀哥呀仔品牌，仲有好多小店，米線好似不知不覺成為我哋呢一代嘅主要食糧。今日我就同食開三小辣嘅A姐介紹一間主打四川冒菜嘅選擇俾大家，雖然呢間位於尖沙咀嘅烏蠅館，唔係米線專門店，但原來將米線配上冒菜係咁好味！起源成都嘅冒菜，表面好似同麻辣燙無乜分別，但其實冒菜較麻辣燙少油，入口辣而不膩。而店鋪以木色為主，仲有好多中國特色嘅擺設。湯底用22種香料炒香，加上藥材，黃油、芥花籽油同三種辣椒熬煮而成，最後再加芝麻、生蒜、葱同芫茜，令到個湯更香！所以辣得香而不麻，仲一啲都唔油膩，最重要係身上無麻辣鍋嘅氣味，咁偷食都無人知啦。而呢度好似食車仔麵咁，喺點單紙剔自己想食嘅配料，米線控嘅我哋就當然一人一碗啦，仲可以揀足8個餸，好豐富呀！我哋推介索晒汁嘅豆卜同魚腐；仲有新鮮爽口嘅淮山同雲耳；當然唔少得乾淨又入味嘅大腸啦。