我哋點餐之後好快就上咗個湯，冬瓜螺頭燉湯。冬瓜嘅清同螺肉嘅鮮甜balance得好好，湯裡面都落足料，只係嫌佢咸咗少少。
北寄貝算係幾大粒，而且新鮮，隻隻都開口，貝肉都算鮮甜。
鮑魚上面放咗啲虫草，呢個都ok啦，但同你響街市買反嚟蒸個味道分別不大。
主角龍蝦出場
，我用刀叉將成條肉起咗出嚟。龍蝦肉質非常爽口嫩滑
，亦都保留住肉汁，非常鮮味
！
日本大元貝大粒乾淨，如果你鍾意食生嘢的話，可以叫佢唔好蒸咁耐，粒肉會更加嫩滑。
美國石蠔，失望嘅一個菜式
。望落去算係都新鮮，上台果陣隻蠔都係連殼嘅。但係食落去卻無咩鮮味，一方面佢蒸得太熟，口感有啲韌同硬，同埋佢調味方面落得太重白胡椒粉，蓋過咗蠔本身嘅鮮味。對於我呢個咁鍾意食蠔嘅人嚟講，失敗! 
海蝦 － 普普通通，不過不失～
食完晒海鮮之後，就到任食環節。我哋第一樣試嘅就係蟲草雞，我從來冇食過蟲草，但覺得佢哋都幾配。雞肉新鮮嫩滑，調味恰到好處，值得推介！
甜粟米+雜菜籃 - 粟米ok，但唔算超甜。其它雜菜都新鮮，都係第一次用蒸氣烹調雜菜，幾有新意，原來咁整菜都幾好食。
到最後終於食個鍋底 － 新鮮排骨粥，經過咁長時間嘅熬煮，個粥底已經好靚好綿，再加上咁多海鮮同埋配料嘅精華，再加上佢本身嘅排骨，全部都融入咗響個粥底裏面，真係無得唔好食。但當然，如果你要同粥底火鍋相比，我朋友都話粥底火鍋個粥比呢個好食得多，始終粥底火鍋個粥係直接用嚟碌嘢食。
蒸氣火鍋呢個idea真係幾好
，用蒸氣烹調食物健康之餘，唔洗落好多油，又可以保存到食物嘅鮮味，每一滴味道都會保存住響食物身上，就算流走咗都會比個粥底吸收咗。總括嚟講，海鮮方面都算係好新鮮，任食配料方面雖然選擇唔多，但勝在質素良好。但始終佢呢個食法調味上會比較單調，冇錯咁樣可以最食到食物嘅原味同鮮味，但成日都係咁食就會悶，應該一年食一，兩次就夠，保持新鮮感
。
價錢方面，兩個人，八百蚊有找，如果平日的話平返少少，或者做番個優惠就好喇，同日式放題或者同其它飲食火鍋相比，性價比略嫌為低，同蒸氣海鮮相比，我自己更愛食刺身。希望遲啲會有更多優惠同更多新菜式。
