龍如酒家

Open Now

Now Closed

今晩係舅父生日飯，一行十人，budget 每人$250 叫老闆發辦叫餸。龍如最正係酥炸蠔同紅燒斑頭腩！送嘅豆腐魚湯，好香豆腐味，魚湯好清甜。豉椒炒蜆豉椒好惹味，不過好多蜆肉都甩晒殼，可能唔係太新鮮。蒜蓉粉絲蒸扇貝扇貝都幾大粒，有蒜蓉粉絲同豉油好味。酥炸生蠔必叫！！超大隻生蠔，蠔味濃又多汁，酥炸好鬆脆。紅燒斑頭腩一魚兩食嘅份量真係唔係好夠喉，即encore。沾上薄薄的炸粉炸完之後打個茨汁，簡直係龍如嘅招牌菜，咁多年都保持到水準。炒斑球起晒骨，啖啖肉，好鮮味。豉油皇大蝦蝦好乾身，豉油皇好好味，不過蝦嘅肉質唔係太彈牙。薑蔥炒蟹好有獲氣，蟹肉鮮甜。臨走仲送蝦羔同蠔油，又食又拎。