棠記海鮮小廚

Open Now

Now Closed

同朋友入黎三聖食下野，無晚市就提早晏晝食啦，去左棠記食，估唔到晏晝都好多人食海鮮喎，唔少人都係帶海鮮黎加工㗎。諗緊點咩好，店員送上餐具同熱茶，示意我地洗洗佢。朋友本來想叫啤酒，不過諗諗下晏晝都係唔好啦，改叫左罐忌廉，自己就叫左杯凍檸水走甜。呢碟豉油王大蝦超香，一上枱就聞到啲豉油味飄過黎啦。蝦大大隻，個殼好易剝，蝦肉很鮮味，豉油雖然香，但無蓋過蝦嘅鮮味，堅好食呀。第二樣係豉椒炒蜆，蜆肉大隻又新鮮，無沙亦無腥味，豉椒炒又香又有鑊氣，炒起上黎差唔多隻隻都仲有肉㗎，唔係得啲殼。個汁真係好好味，就算隻蜆肉甩左，舐下個蜆殼都好正。另外仲有呢度個名物菠蘿咕嚕肉，個菠蘿擺得幾靚，好甜又無渣，咕嚕肉個汁好好味，酸甜度剛好，咕嚕肉啖啖肉㗎，走過油香口又脆身，正。最後仲有蒜蓉炒菜心，條條菜遠㗎，蒜蓉香口，炒得又唔油，好味無投訴。咁好餸點都要叫碗白飯食下嘅，熱辣辣幾大碗。同朋友傾下偈幾寫意，唔知幾時先可以有晚市堂食呢。