Video
Read full review
2013-01-01
447 views
9月4日, 去完360, 夜晚出番跑馬地, 食我地嘅週年晚餐, 要數又浪漫又有情調, 加上食物又有水準, Amigo最適合不過~ 我地book咗8點鐘, 但係我地早到咗而我地張台又未ready, 侍應於是安排我地喺地下嘅酒吧區等住先, 原來下面d位都幾舒服架喎! 等咗一陣就有位~ 我地各叫咗一個3 course $690同4 course $790嘅dinner set~::: 麵包 :::有侍應會拎住個麵包籃埋嚟俾你揀麵包, 都有4-5款唔同嘅, 每一款我地都有要~ 麵包微暖軟熟, 食落好香麵粉味, 尤其有個多士好特別, 十分香脆~ 亦都要提埋個牛油, 好有心機咁整成玫瑰花狀, 為呢個環境更增添一個浪漫感之餘, 牛油味亦夠香濃~ 麵包係可以任添, 喺食主菜之前, 侍應都唔會收麵包碟, 我地都添咗2次~::: 香煎法國鮮鵝肝 :::先來一個頭盤煎鵝肝, 份量都幾大, 好厚身~ 切一刀, 感覺到個皮係脆嘅, 切到中心位就開始軟仲有油流出來, 好肥美咁~ 鵝油實在太香, 一口咬落個感覺好豐富, 外脆內軟嘅鵝肝配上香濃嘅醬汁, 非常飽滿~ 雖然知道呢舊係脂肪, 但少食多滋味, 耐唔中食下又好
::: 麵包 :::
有侍應會拎住個麵包籃埋嚟俾你揀麵包, 都有4-5款唔同嘅, 每一款我地都有要~ 麵包微暖軟熟, 食落好香麵粉味, 尤其有個多士好特別, 十分香脆~ 亦都要提埋個牛油, 好有心機咁整成玫瑰花狀, 為呢個環境更增添一個浪漫感之餘, 牛油味亦夠香濃~ 麵包係可以任添, 喺食主菜之前, 侍應都唔會收麵包碟, 我地都添咗2次~
::: 香煎法國鮮鵝肝 :::
先來一個頭盤煎鵝肝, 份量都幾大, 好厚身~ 切一刀, 感覺到個皮係脆嘅, 切到中心位就開始軟仲有油流出來, 好肥美咁~ 鵝油實在太香, 一口咬落個感覺好豐富, 外脆內軟嘅鵝肝配上香濃嘅醬汁, 非常飽滿~ 雖然知道呢舊係脂肪, 但少食多滋味, 耐唔中食下又好過癮~
::: 海蝦沙律 :::
另外一個頭盤我地叫咗個沙律平衡番~ 海蝦好鮮, 夠彈牙, 可惜份量好少, 只有2小隻開邊… 沙律就係鮮果沙律, 生果都新鮮~ 不過整體都只係普普通通, 唔太驚喜,
::: 美國鮮蜆肉周打湯 :::
可能早幾日飲過一個好難飲嘅周打蜆湯, 所以我地今晚對呢個湯有高度評價~ 隻蜆肉十分大隻, 鮮味就無乜, 但係勝在肉厚, 咬口唔錯, 彈牙得嚟又唔會韌~ 周打湯都幾杰下, 有陣濃香嘅忌廉味, 亦都因為有蜆肉, 更加添一份鮮甜味~
::: 西柚雪芭 :::
飲完個湯, 侍應隨即附上一杯凍冰冰, 粉紅色嘅野, 個鐵杯直頭有冰喺面, 一直冰鎮住~ 一食原來係西柚味雪芭, 份量唔多, 2 啖就食晒, 酸酸甜甜夠晒涼透心. 究竟係幫我地開下胃, 定係見食完d咁濃味嘅野清清嗰喉嚨? 唔知係點, 但係肯定嘅係為咗主菜做準備, 我地準備好喇!
::: 扒特選羊排配薄荷汁 :::
羊扒有3件, 每一件都有網燒嘅痕跡, 望落少少燶又好香口咁~ 羊扒肥瘦均勻, 肉地少少羶好帶出羊嘅肉味, 靠近骨嗰度有少少筋更加有咬口~ 薄荷汁味唔重, 最重要都係要嚟僻走d羶味, 但係反而咁樣先更加食得出個羊味, 個人覺得個蒜頭反而仲好味, 蒜香味十足, 軟淋淋嘅質感好配羊扒~ 另外有配菜包括薯仔同椰菜仔, 睇嚟都係用嚟填飽個肚, 唔算特別.
::: 扒牛柳配帶子百里香草汁 :::
帶子唔算好厚, 就咁薄薄一片放喺牛柳之上. 兩款肉都有炭燒嘅坑紋, 帶子因為較薄身, 所以口感就麻麻… 但係帶子鮮味都唔錯, 仲吸收咗牛柳嘅牛油香~ 牛柳就夠厚, 切開見到嫩嫩嘅粉紅色牛肉, 入口嫩滑肉味濃郁, 好味! D配菜另外奉碟, 烤番茄酸香清新, 可以中和肉類嘅滯膩感~ 而薯茸就好有心思咁整成一個啤梨形~ 反而椰菜仔就真係白烚, 淡茂茂…
::: 朱古力脆糖燉蛋 :::
朱古力燉蛋確實係漏上加漏, 估唔到食到飽飽地, 呢個甜品會食唔晒… 個燉蛋質地好實, 似係雪得過耐, 朱古力味有, 但係蛋味欠奉, 加埋面個脆糖, 甜上加甜…
::: 橙酒疏芙厘 :::
疏芙厘賣相十分鬆軟, 侍應奉上疏芙厘之後會再幫你淋上橙酒~ 疏芙厘本身蛋味豐富, 質感輕柔軟滑, 加埋充滿清新橙香嘅橙酒味道更有層次更豐富~ 不愧為呢度其中一道招牌甜品!
::: 脆皮朱古力咖啡雪糕球 :::
食完甜品, 以為都完架啦, 點知侍應再奉上雪糕球, 個碟又係冰晒… 好彩呢個朱古力冇咁漏, 超級冰凍嘅感覺. 朱古力皮好脆, 個咖啡雪糕都幾好食, 食晒!
::: 拿破倫 :::
呢個拿破倫係為咗我地嘅週年紀念餐廳送俾我地, 不過我地太飽喇, 唯有攞番屋企… 隔過夜先食, 可能雪過, 拿破倫酥皮唔係好脆, 但係仲好香口, 相信如果可以即場食會更好.
::: 餐飲 :::
我地餐飲各叫咗一杯cappuccino同latte~ cappuccino嘅啡味都算濃, 奶嘅程度唔係好重, 適中~ 唔駛落糖個啡味都唔會好苦澀~ latte就奶啡比例平均, 奶味頗濃, 但又唔會蓋過咖啡味, 好飲!
Amigo不愧為一個浪漫慶祝嘅地方, 雖然價錢唔算平不過勝在食物有水準! 而且份量多, 一個4 course set食得非常飽, 加上仲有拿破倫送~ 侍應服務有質素, 會慢慢跟隨客人進食速度上菜, 食足4個鐘都好舒服~ 其間仲有live band周圍獻唱, 知道我地慶祝紀念日仲唱咗首浪漫情歌~ 唯一要彈嘅係環境略嫌嘈雜, 揀個比較角落嘅位會好d. 多謝Amigo為我地結婚一週年劃上完美嘅句號!~
Post
