沙田新強記燒鵝海鮮酒家

Open Now

Now Closed

住咗大圍咁耐竟然唔知道大圍有咁正嘅酒樓，真係冇面原來新強記喺大圍已經有好多年歷史，入面啲侍應大部分都上咗年紀，但咁樣反而覺得仲好，覺得老闆好有人情味。中午食飯時間，超級多人。都要等左陣先有位。黎呢度之前已經做曬功課，知道呢度有幾樣名菜，就係燒鵝/乳鴿同雞粥。招牌燒鵝：果然冇令我失望，首先係隻燒鵝一啲都唔肥，因為真係好驚食到成層肥膏嘅燒鵝，隻燒鵝好滑好juicy，真係冇叫錯，果然係招牌。招牌乳鴿：佢哋同出面唔同，呢度係成隻乳鴿上，仲會提供埋手套同鉸剪，可以自己一手一腳搞掂，隻乳鴿新鮮炸起，外面脆，內裏保持肉汁鮮嫩，食多幾隻都唔會漏。五柳炸雲吞：雖然係炸，但一啲都唔覺得油，入面啲餡料都好充足。碧綠鮮蝦腸：腸粉皮好薄好精瑩通透，入面啲蝦仁粒粒都好大隻。香煎芋絲餅：超級好食，喺出面未食過咁嘅味道，個芋餅唔會太乾。鮮蝦腐皮卷：出麵食嗰啲腐皮卷又薄又油，呢度好唔同，腐皮卷好足料而且又唔油。總結：以後飲茶一定會再嚟呢間，食物質素同價錢都好相宜。