茶墨 (Closed)

有日因為工作嘅關係，搞掂手頭上嘅嘢都已經接近三點，未食晏但係夜晚約咗人又唔想食到太飽，同事就提議不如食個蛋糕飲杯嘢當一餐，於是就去咗The ONE嘅茶墨。茶墨嘢飲嘅選擇都唔少，除咗佢嘅招牌水墨風系列，仲有雪糕奶昔、奶茶、焦糖芝士、冰搖茶、茗茶、純茶同埋養生茶，我呢就幾怕飲甜嘢，而且一場嚟到冇理由嗌杯奶茶就算，所以就要咗杯睇落最唔甜嘅水墨風芝麻烏龍茶。問咗店員有邊隻蛋糕冇咁甜，佢介紹一係試吓個伯爵茶蜂蜜蛋糕或者個柚子芝土蛋糕，咁我就試咗個芝士蛋糕。水墨風系列係茶墨嘅招牌飲品，佢用芝麻醬當墨水畫喺隻杯入面，幾有創意。上面都有提過我唔飲甜嘢所以我叫咗無糖，芝麻嘅少少苦味加埋烏龍茶本身嘅味啱啱好。芝士蛋糕平時都會好甜，不過溝埋啲柚子味中和返，柚子嘅清新味同蛋糕嘅甜味亦都啱啱好。整體而言，我覺得佢個茶幾好飲，打卡一流，下次可以再飲。