餐廳雖然比較狹窄，但裝潢非常地道，從超人貼紙，海報到玩具都散發濃烈日本懷舊氣息。
值得一讚係餐牌，食物嘅圖案同旁邊嘅文字變得卡通化，非常趣緻。
餐廳嘅拉麵以金木水火土作為簡寫。不過餐廳做緊兩款人間限定，當然不能錯過。
首先我揀咗牛舌牛尾湯拉麵。湯底入面嘅牛骨味幾香濃，而主角既牛舌口感柔嫩，但同時保留牛舌一定嘅嚼勁。筍同蔥分量超多，令拉麵更具風味。
麵質方面，餐廳嘅拉麵掛湯能力高，所以食每一啖麵條既同時，都可以品嚐到湯底濃縮既精華。
至於朋友叫咗極上海老吟釀拉麵，一上枱就已經聞到陣陣蝦既鮮味，湯頭可謂相當濃郁，海蝦亦非常彈牙。麵條方面，朋友選擇左普通，結果麵條都幾彈牙。
朋友加麵就係拉麵好食既證據
另外仲叫咗款小食，免治雞軟骨串啖啖肉之餘仲有咬口，表面微焦，不過感覺醬汁同雞軟骨串並冇融合一起。
我同朋友見餐廳嘅飲品係出面比較少見，所以叫咗蘋果梳打同山葵薑味汽水。有啲樽裝嘅蘋果梳打味道好似藥水，但呢款完全係真正蘋果甜味，非常討好。至於山葵薑味汽水帶點微辣，辣度冇想像中咁嗆。
如果每日返完工都可以食到拉麵來，我真係非常感動。不過財力有限，希望之後每個月都可以嚟食一次啦。
