OPPA韓國燒肉店 (Closed)

琴晚係大埔接完朋友放工，諗左好耐打邊爐定食燒肉好，最後試左呢間OPPA燒肉，真係好值得推介！一踏入門口，店員就好熱情招呼我地，仲同我地推介一個$238牛肉套餐，我地見個套餐入面有齊唔同國家、品種既牛肉，包括澳洲、鹿兒島、加拿大、美國、仲有A4黑毛和牛！緊係試一試啦！係我地睇緊菜單既時候店員已經將配菜送上，配菜同其他韓燒餐廳無異，店員隨後係我地爐邊淋上餐廳自制蛋漿，我地叫完野食見啲蛋差唔多熟就食住蛋先，食左一啖發現入面有足料泡菜！簡直將佢味道昇華！後來店員將主菜送上，送黎既時候我地都不禁嘩然，餐廳有心思地將不同種類牛肉整齊列好，再係肉上面加上一個小小既標籤（詳見圖片），再用竹盤盛好，我見隔離台客人問及肉類燒法時，店員仲會熱情幫佢地燒！牛肉非常新鮮、鮮嫩多汁，我同朋友都非常滿意呢一餐！但由於我地得兩個人既關係，覺得份量稍微有啲多，如果三人食就岩岩好喇，仲可以試多啲其他野添！飲品方面，加唔同價錢就會有果系列既飲品任飲，例如果汁、汽水任飲，都係$30有找，勁抵！呢間餐廳值得再去！