唔想嘥時間，我地就係等緊位嘅時候睇定餐牌望吓周圍， 諗定一陣間食乜嘢！一坐低侍應俾咗幾杯水我哋，服務好好！
行街行到有啲口乾，梗係要叫返個《椰青》飲吓啦，順便清下熱。椰青好新鮮，雪得好夠凍，飲落去好清甜。
等位嗰時見到周圍其他人嘅菜式，樣樣食物都好吸引，好想所有都叫嚟試吓，可惜我哋唔係太多人，咁只好叫個《小食大拼盤》（有蝦餅，魚餅，春卷，生菜包）份量都算多，蝦餅香脆彈牙， 好有蝦鮮味，春卷同魚餅相比於蝦餅就略為失色，但係都好有泰國風味，至於肉碎生菜包就好正宗，不過我覺得有點辣，家人就好鐘意。
家人鐘意食魚，就叫咗《鹽焗烏頭魚》，魚燒得啱啱好，原汁原味，好鮮好香。
《串燒》有6串（2豬2牛2雞）燒得好香，好有炭燒香味，加小小沙嗲汁另到串燒食落變得多一份層次。
《泰式菠蘿炒飯》用新鮮菠蘿裝着啲炒飯，依家好多泰國餐廳都會偷工減料唔用新鮮菠蘿， 好欣賞佢哋用料正宗，飯炒得好香，有香香咖喱味！
