宮崎肉本舖 (Closed)

呢餐係真真正正滿足晒呢兩年幾無得去日本食燒肉嘅感覺！聽講呢間係日本宮崎肉本舖首間香港海外分店，個餐講都明食到桜花牧場和牛，所以約埋幾個日本朋友一齊嚟試。聽職員講解，和牛油花分布達到10級標準，一試之下，肉味真係好濃，滿滿油香，但一啲都唔滯。而當中最驚喜嘅係，就可以任食三種日本和牛內臟，係香港試過其他高級燒肉餐廳，都只係食到美國或者其他地方。當日試咗日本和牛牛腸，牛舌，同牛肚，第一次係香港食到日本和牛嘅牛舌，厚身，鮮嫩Q彈，配店家獨有醬料，連日本朋友都大讚ichiban！不得不讚店員細心服務，我地坐係房，佢地送嘢食入嚟時，都有介紹度食材同燒法，等我地可以一路傾計，一路都掌握到點樣燒到最正宗嘅燒肉。除咗食和牛，聽職員講佢地嘅食材100%由日本入口，有嚟自青森同鹿兒島嘅黑豚同新潟地雞。我地試咗出面無食過嘅日本豬頸肉同好特別嘅鷄頸肉同雞冠、甲羅燒，海膽泡飯，日本粟米同淮山沙律。真係估唔到標榜食日本和牛嘅燒肉舖，除咗和牛得之外，其他食材都好有誠意制作。作為每年去6-7次日本嘅香港人，係宮崎肉本舖尋回100% 家鄉風味，真係誠意十足，真係將日本燒肉回憶帶晒返嚟！