地點都好方便，灣仔MTR會展出口行幾分鐘就到，好易搵。😄
環境係酒樓格局，但對比我之前係觀塘工廈食過既X膳，呢到係唔會有好大陣油煙味，或者係地下唔乾爽。呢到真係好企理同衛生，老闆同侍應姐姐都好好態度同禮貌，好加分！👍🏻👍🏻👍🏻
杏汁燉白肺湯：首先我要講個湯係我飲過甘多湯以黎最好飲既一碗！佢個湯好奶白、口感好滑、好綿。😋😋😋
同埋個豬肺處理得好好，好乾淨同軟林林，唔會食到有異味。真係世界級好飲，唔怪得佢地話都聲稱呢到既燉湯係好出名。😝😝
蜜餞藕片煎金蠔：果然係金蠔，好大隻，煎得好金黃，而且個蓮藕片應該係炸完再同埋蜜糖一齊煎，所以好甜脆。而金蠔一切開就好香，好有新年菜既感覺。
1
荔芋乳鴿酥配自家製XO醬：佢最外面個炸粉做得好好，好薄好脆，芋泥好綿滑。入面食到仲有乳鴿粒、洋蔥粒同香茹粒。
蝦子柚皮：呢個係佢地既招牌菜亦都係功夫菜。個柚皮好厚身，蝦子醬多到包圍晒成個柚子皮甘滯。因為我係第一次食柚皮，都唔知應該點形容，個柚皮既口感好林，而且係好入味，唔會覺得好苦澀。
粥水白果浸菜芯：真係孤陋寡聞，平時上湯浸菜芯就食得多啦，粥水浸菜芯又係一個新嘗試。菜芯用料靚就一定嫁啦，而且岩岩食完煎炸野，跟住食呢個菜芯其實都幾解膩。
跟住仲唔識死叫左個臘味滑雞煲仔飯，大煲到大胃王都要投降呀😂😂😂臘味既香同油脂加埋煲仔飯豉油撈飯食真係一流。飯煮得岩岩好唔會太硬或太軟，所以底個飯焦都係好靚仔。臘味全部都好食，肥瘦適中，易咀嚼唔會好硬，而個雞件都真係好滑。
1
最後緊係要食飯個蛋白杏仁茶黎個完美既ending 啦！好香杏仁味，食落好滑、但個杏仁味又唔會好搶，佢仲要好似蛋白撞奶既感覺，好有口感。
今餐真係好滿足，好多菜式我都係第一次嘗試，特別係個杏汁燉白肺湯真係好令人回味。食物質素同服務態度都100分👍🏻👍🏻👍🏻
