心夜來潮 (Closed)

行開旺角，總有幾間餐廳係經過想試嘅，而今晚黎到嘅心夜來潮，就係其中一間。一聽店名就知道主打潮州菜，餐廳位於旺角中心對面，地點就腳，不過餐廳位於二樓，注意要行多幾級長樓梯上去喇。黎之前睇過下menu，最新系列係啫王之王，全部都係煲仔菜式，個名夠哂勁不過因為眼闊肚窄，今次就嗌住幾樣先😂秘製花膠豬手墨魚脯煲🍲啱啱炒起好有鑊氣，主要係好多豬手，豬手肉炆得好淋充滿膠質。花膠好入味，原整一大塊，唔係碎濕濕上，墨魚亦好爽口。豉汁啫白鱔🥘白鱔大大件，係魚尾嘅位置，肥美肉滑，完全無腥味，仲要份量好多，有十幾件，性價比極高！（行開街市都知道鱔一啲都唔平）。枝竹索晒啲豆豉汁，淨係呢味餸我都清左成碗飯😋滷水雙拼（豬大腸+豬耳）🐷初頭見顏色咁深以為會好咸，點知味道剛好，豬耳多肉有厚度，豬大腸肥左少少，不過好在唔會膩，份量夠3個人share！整體餐廳環境坐得好舒服，店員亦不時有關心我地有無漏單嘅情況，態度親切，絕對係gathering嘅好地方。