叉燒大王

Open Now

Now Closed

週末同阿爸阿媽去沙田探完親戚，巴士站附近都有好多食店菜館，諗住響附近食埋晚飯先番屋企。好耐冇阿爸阿媽出去食飯，兩老喜歡食中菜，特別係燒味，所以去左呢間叫叉燒大王嘅中菜館，七點幾店門口已經大排長龍，睇黎非常好生意，攞左號碼紙等位，等左一陣終於有位。入去時侍應就問我地飲咩茶先，幫我地準備好茶水；店入面裝修都唔錯，燈火輝煌，又裝左幾部電視，雖然食客幾多，不過坐位寬闊，坐得都舒服。蜜汁叉燒王叫得叉燒大王，佢地嘅叉燒梗係必定要試啦，呢度嘅叉燒真係好正，半肥瘦叉燒，脂肪比例平均，淋左蜜汁，味道非常香甜，用黎送飯一流！京汁棒棒骨一碟有四件，賣相幾得意，可以攞住棒棒骨黎食，啖啖肉，京汁味道同咕嚕汁差唔多，酸酸甜甜好開胃。雲南火腿蝦乾炒九菜花呢碟係侍應推介，阿爸阿媽鍾意食蝦乾同九菜花，呢個菜啱哂佢地，雲南火腿切得非常薄，咸香惹味，加埋蝦乾九菜花一齊炒，味道非常配合。蒜蓉粉絲蒸聖子一碟有五隻，隻隻都勁大隻，聖子真係好正好新鮮，肉質鮮甜肥美，蒜蓉粉絲非常好食，飯都可以食多幾碗！非常唔錯嘅一餐中菜，呢度叉燒固然正，估唔到叫嘅其他三樣菜都好味，同阿爸阿媽三個都食到好飽好滿足！