滿福樓

Open Now

Now Closed

一早聽聞呢度嘅中菜非常出色，今次早咗一星期訂枱都訂到海景位置，好幸運！沙薑白雲豬手～超超超入味，鹹香開胃，豬手非常Q彈，做前菜一流。風味金榜開邊龍蝦～叫一份開邊足夠二人份量，龍蝦肉好厚，醬汁好特別，聞落超級香，感覺有啲似好濃椰汁嘅喇沙味，呢個配搭好新鮮，旁邊仲有個炸饅頭，點埋剩低嘅醬食，真係好滿足！咕嚕肉～侍應特別推薦我地叫咕嚕肉，果然真係無令人失望，佢地用咗黑毛豬肉，咬落去非常鬆化，一啲靭嘅感覺都無，同平時出面食到嘅真係唔同。魚腐浸唐生菜～上菜時見到魚腐好似成個網球咁大，真係有啲嚇親，魚腐吸收晒魚湯嘅味道，入口非常鬆軟，好好食！唐生菜都好爽嫩，最後仲可以飲晒啲湯。椒鹽吊片～呢個就相對遜色，味道係足夠，但炸得唔夠香口。甜品方面～特別鐘意食佢個蛋散，加埋啲糖漿真係好脆好好味。楊枝甘露好似飲緊芒果布甸，芒果味好濃。蛋撻都唔錯，但唔算好特別。