一上到黎就事不宜遲較返個醬先
呢度啲配料有齊晒我鍾意既辛香野，仲有個出面少見啲既麻油
呢度既湯底都有幾多種類下，補身既又有，有海鮮既又有，好似我呢啲有選擇困難症既真係要揀好耐先揀到
呢度除左邊爐料仲有好多野有得食，有刺身、燒烤、小菜，最勁係有私房菜！呢個就要等下次先試到了
睇佢啲菜式都覺得好吸引！特別係對我呢啲海鮮迷黎講
最後嗌左個鴛鴦鍋 (血池麻辣湯拼姬松茸冬瓜湯)，一上湯底時聞到好大陣花椒香味！
我就最鍾意食牛架啦
一上就即刻擺幾片落去淥下先！牛肉肥瘦適中，入口時唔會覺得好柴，唔錯！
我最估唔到個海鮮set隻蟶子皇大隻到咁！蟶子皇好鮮甜，仲耍啖啖肉
廣島蠔冇乜點縮水，鮮味濃！大花甲冇沙，好甜
呢個雞件千祈唔好烚太耐！岩岩好嫩滑就最好食
四色丸最有驚喜係金沙鮮牛丸，牛丸好彈牙夾埋鹹蛋黃沙沙地咁既口感，有啲對比但又幾得意！
個百花釀油條 (即係墨魚漿釀油炸鬼) 係現炸再俾我地烚，個外皮吸晒啲湯汁，好好食！
呢度既響鈴腸睇落都係即炸的，浸兩三秒再食，岩岩好外面吸晒汁入面仲係脆既，正！
同朋友兩個人嗌左JAR青檸梳打蜜，配上打邊爐比較膩既野，好fresh～
埋單時先發現原來早啲走或遲啲黎有折，而我地揀左個perfect timing：就係乜折都冇啊
整體黎講都非常滿意呢度既服務非常好，職員會自動幫我地"畢"走啲油，又會見我地冇乜湯時埋黎加湯，黎野飲時仲有問洗咪幫我地斟埋，真係不得了！有咁既服務真係一定有下次！
