呢間新派素食店未開張之前已經收到朋友推介, 話係朋友開,
係半自助形式私房菜~ 其實開頭聽到都唔知係點, 又半自助又私房菜@@
31號開張日, 陪朋友來捧場, 8:00時段有個半小時任食,
第一日已經座無虛席, 好多人~
去到唔需要等位, 即刻可以坐入去。
店面好細, 只有30多個座位, 而且每張檯都係4人檯,
我地6個人去食, 店主幫我地拍埋左一張檯, 可以6個人一齊坐,
後面有檯人好似成8-9人, 都拍埋左幾張檯,
但睇落佢地有少少迫, 如果人多又唔介意分開少少坐隔離檯, 會舒服少少。
(其實好近可以照傾計, 唔使一定要痴到實)
檯面有張餐牌, 寫住今日精選嘅套餐, 西式嘅... 好新奇, 齋都有得据扒
店主解釋每人有一份set, 另外出面嘅自助食物任飲任食
頭盤黎喇，今日係大蝦天婦羅
(賣相本來靚d, 我想食嘅時候先記得影相整亂左)
嘩嘩... 好有驚喜! 個蝦好似, 好得意=] 天婦羅炸得好脆而且無乜油, Good！
同檯嘅朋友仔都好鐘意食。
之後係主菜, 燒春雞
一上檯我笑左, 真係整到半隻雞咁樣XD
可以選汁, 我選左黑椒汁, 個汁都幾香, 不過唔辣。
隻雞口感好得意, 唔似齋~ 好味!
又一大驚喜︰配菜甜紫薯！外層脆口嘅, 而且甜甜地, 入面淋淋地嘅粉質蕃薯, 好好食！
平時好似好少食倒咁紫嘅蕃薯, 原來咁好食！
甜品叫心心相印
係桂花大菜糕&普通大菜糕, 個汁士多啤梨味~
平日桂花糕好似有魚膠, 食素人士唔食得,
我諗因為咁所以佢地用大菜代替魚膠,
質地一定唔同平時桂花糕, 但都幾香, 我就覺得可以再甜返少少, 話曬係甜品
出去睇左一轉, 出面有o既食物有素翅, 炒飯, 齋鹵味, 咖哩薯仔唔知咩, 羅漢齋, 涼拌粉皮, 炸蕃薯、炸芋頭、炸乜乜...
飲品有幾款汽水同埋日本玄米茶~
店主話自助食物次次出o既唔同無特定菜單~廚師見乜野新鮮就煮乜@@
食完頭盤主菜, 每樣攞左少少返黎食
素翅--我唔太鐘意食碗仔翅, 所以呢個我無食. 不過朋友們話好正
炸物--好多款一盤過, 夾左一堆返來大家大抽獎XD
我食倒嘅有炸蕃薯、炸芋頭, 好食,
眼見朋友抽獎咁抽倒炸蘿蔔, 炸薯仔, 炸蕃茄... 乜菜都炸得？
同天婦羅蝦頭盤一樣, 炸得夠脆唔厚粉, 而且唔油膩。
(張相係一見佢新鮮出爐即影, 之後已經比我攞左半盤XD)
齋鹵味--好味, 個人最愛係酸齋, 唔肥膩, 個味整得好好
炒飯--好似咖喱炒飯？幾香夠乾身, 如果可以加少少提子乾落去炒仲正！
咖喱--我去攞嘅時候已經比人攞曬, 得返薯仔>.< 咖喱味校得好, 薯仔炆得好淋, 好味！
仲飲左2罐可樂......好飽好飽, 食完個套餐已經飽左一半, 食埋出面嘅食物真係飽到上心口~
8:00PM時段$128一位, 新開張有9折, 仲有張永久9折咭送比客人,
新開張優惠上Facebook讚好專頁仲有8折, 我地當然照做埋,
埋單$103一位, 好抵！
無諗過食齋都咁特別同咁飽, 而且味道真係唔錯,
唯一無咁滿意嘅係地方比較迫, 太多人行出行入有少少唔方便,
另外就係個人認為自助食物可以再多少少特別款式, 希望有埋水果同素魚生！
