天機棧扒房 (Closed)

朋友聚會，訂左枱吃飯。當時全場大約7成人到，落左order。等order時，去左洗手間，勁污糟，廁所又壞埋無水，唉 。。即刻對呢間野大打折扣。等左10分鐘，開始上小食: 田螺薯蓉同香煎鵝肝，2樣都唔錯。但之後上湯就等左成15分鐘，但只係普通白湯同紅湯，都唔明點解甘耐？更神奇嘅係我個fd遲左30分鐘到，佢一叫主菜後，竟然10分鐘後，成枱啲主菜一次過上晒枱。但佢個湯都未上，就上主菜，啲次序錯晒，極有可能係整多左，推埋落我張枱。主菜: 賣相唔錯，西冷Ok，咸豬手份量十足，皮脆肉嫩。雞卷黑松露意大利飯，都唔錯。香煎魚柳南瓜意大利飯，魚柳唔錯，但個飯無乜味。甜品: 心太軟同法式燉旦。2樣都麻麻服務都麻麻，明明訂枱時話唔限時，點知食左2粒鐘就趕人走。話有人訂左枱，等緊位，結果迫住埋單走人，出到去見到有幾張枱都係吉嘅，而且出面鬼影都無隻，甘樣趕客法，而且衛生麻麻，想再幫襯都難。