一風堂 (Closed)

嚟到銅鑼灣，原本係想食新開嘅豚王，但由於太多人排隊喇，所以改咗去附近嘅一風堂。呢間同尖沙咀嘅盛況完全唔同，下晏3點幾去到，等5張枱﹝大約10分鐘﹞就有枱。坐坐吓甚至有幾張吉枱添，唔知係咪因為啲人去哂食豚王呢？呢度環境骨子整齊，有啲麵餅、碗同匙做deco，牆上面有一風堂嘅歷史簡介同埋有電視機播放一風堂嘅片。枱上面有胡椒、芝麻等等嘅調味料可以俾食客選擇。睇睇menu，好似多咗啲口味選擇，今次我揀咗山葵豬骨、而男朋友就揀咗味噌豬骨，仲order咗碟豚肉炒泡菜。先嚟嘅係山葵豬骨湯麵，店員亦有提醒我話飲湯時唔好大啖飲，驚會chok喉。湯底味道濃郁得嚟帶有輕輕嘅wasabi味，好味得嚟又幾得意。配料有兩塊叉燒、筍同啲蔥粒，麵係幼麵。好期待咁食第一口麵，um…有啲失望。相比起尖沙咀一風堂嘅麵真係差好遠。麵嘅質感好似有啲“粉”，唔夠咬口。同埋碗麵唔夠熱。我記得上次去尖咀食我係食到停唔到口，但今次食食吓就有啲唔想食。而叉燒就唔錯，肥瘦均勻同埋幾淋。而男朋友嘅miso tonkotsu，我就只係試咗啲湯，味道好濃，但見到好多油脂，感覺有啲油膩。麵係粗麵。最後嘅豚肉炒泡菜，上枱時暖暧哋，泡菜味好濃，豚肉就一