蒜子火腩大鱔煲
上碟嘅時候仲係出晒煙，熱辣辣好有鑊氣👍🏻，有五件火腩同五件大鱔，仲有兩舊大冬菇，好足料😍，加咗好多香蔥同蒜爆香，好惹味😋 大鱔好鮮味，肉質彈牙，唔多骨，走左油所以好香口好入味，配埋啲醬汁送飯一流😋 ；火腩肥瘦分明，大大件好滋味；大冬菇都幾厚身，好入味，呢個煲值得推薦👍🏻👍🏻👍🏻
馬拉盞醬爆龍躉球🐟
龍躉球有五六件，全部起晒骨，肉質彈牙，新鮮多肉大大件，上碟嘅時候熱辣辣，加咗青紅椒爆得好有鑊氣，配埋盞鬼馬拉盞醬好惹味😍
白灼鮮蝦🦐
大部份都好新鮮，肉質爽口彈牙，簡單配上辣椒豉油，原汁原味😋
豬皮蘿蔔魚蛋
套餐加$28就有呢款小食，都幾抵，豬皮爽口彈牙，蘿蔔煮得好淋好入味，魚蛋就比較細粒，質感結實。
腐乳通菜：
通菜翠綠，已經切好咗方便食，腐乳醬好特別，好似芝士咁Creamy，鹹香味濃。
雪梨蘋果燉豬展雞腳湯
燉湯材料豐富，有一大舊豬展同一隻大雞腳，加咗雪梨同蘋果好清甜，油份都唔算太多👍🏻
樽仔奶茶☕️
加$9可以轉特飲，好香茶味，質感好幼滑，茶味同奶味嘅平衡非常好，甜度適中☺️
整體來講，食物質素不錯，中式小菜好有鑊氣，上菜速度非常快；職員會主動帶位同執枱。
