樂天大喜屋 (Closed)

上次試完元朗大瀛喜，充滿驚喜，今次再去同系嘅旺角樂天大喜屋。餐廳佔咗一層，真係非常大，自助前菜、甜品、飲品區自成一角，連生啤、梅酒、清酒都任飲，唔少得自助雪糕機，有得食有得玩。飲品櫃都有8大個，連熱嘅罐裝飲品都有，非常貼心！先叫我至愛嘅刺身，三文魚、油甘魚、劍魚腩、帶子、極大赤蝦、甜蝦、象拔蚌、馬刀貝，赤貝、一d雪味都無，肥美鮮甜，正正正！壽司、手卷都好味，細細件無咁易飽，可以食多d其他野。特別欣賞創意壽司，好似芒果魚子花之戀、黑松露赤蝦拖羅塔、海膽大蝦三色花、香芒龍蝦沙律卷，全部都配搭得好好，味道好夾，必點！食完刺身壽司，係時候點d熟食。熟食種類很多，炸物、串燒、煮物、鍋、天婦羅、粥，炒花甲、燒牛肉，多不勝數。我最愛係榴槤波波，上次喺元朗食過，一試難忘，外皮炸得酥脆，榴槤餡軟糯又甜又流心，榴槤味香濃，要留肚食多幾個！最後以甜品作結，呢間餐廳除咗有一般雪糕甜品之外，仲有Haagen Dazs，我哋食咗焦糖脆餅味道同季節限定櫻花味，幾時都話食過Haagen Dazs, 返唔到轉頭食一般嘅雪糕😄二百幾蚊有咁多野食，又有咁嘅質素, 完全超出預期！