阿美車仔麵 (Closed)

星期日大角咀都好鬼多舖頭閉門，所以都無乜選擇。我就醒起依間野，都開張一段時間，就即管試試依間野。

蘿蔔紫菜牛柏葉鯪魚球米線

$56

兩條友叫左兩個麵。依個係紫菜蘿蔔牛柏葉鯪魚球米線，牛腩汁。紫菜就正常野，無乜特別，蘿蔔都夠淋幾甜，牛柏葉爽口，唔會好韌。煮時間剛剛好。應該唔似煮好放定哂係到果啲。似即叫即放落去煮果啲。鯪魚球都幾好，唔腥，都幾新鮮。米線夠淋夠滑。

娃娃菜底豬紅魷魚金錢肚

$52

另一個麵叫左牛肚咖喱魷魚豬紅娃娃菜底，唔要麵。娃娃菜夠淋甜，牛肚都夠味，可以淋多小小，魷魚辣辣地都唔錯，豬紅正常野。
依間野自助落車，車仔麵黎講都唔錯，味道都幾好。男仔黎講就麵小左啲啲，女仔就一定夠。五十零蚊一個人。總體黎講都幾好。可以再食。