韓珍 (帝國中心) (Closed)

韓珍我哋都係我哋一班同事經常幫襯嘅食店，堂食質素係好穩定，份量又好豐富，係幾唔錯嘅食店，我哋 keep 住個月月都幫襯幾次。近來唔知係咪因為疫症，所以設有最低消費，規定每人至少要叫一個餐。哩個我哋明白嘅，但係點解落單時唔講呢？細食嘅女同事經常都係兩個人 share 一個餐，依家話唔得，但係我哋四個人落叫三個餐，侍應完全無提過。跟住兩個餐到咗，第三個餐差唔多佢哋食完先嚟到，咁都算啦，反正我食得快。點知，等到我都食完啦，侍應先攞住 menu 走埋嚟話有最低消費！小姐，唔係等大家食飽先講呀嘛？咁無法啦，我哋又唔想同你嘈，lunch 大家都趕時間，我哋就叫個鮑魚人參雞打包啦！我真心覺得佢個人參雞唔錯，我先至叫，唔係求其搵個最平嘅餐填數。點知返到去發現個人參雞真係唔係幾得，你幫我折埋骨，我真係感謝你嘅，但係碗嘢“杰”個碗粥，所以嘢溶溶爛爛咁塞落個碗度就算，我加水煮都㗎唔掂，唔好話跟佢用微波爐翻叮，根本見到完全唔想食。你要我俾多個錢，保障你收入，你至少俾啲食得嘅嘢我，咁樣真係好浪費食物。相中已經加咗一飯碗水再加熱嘅樣………