不嬲都冇咩所謂嘅我，梗係馬上舉腳贊成
九重鮮位於天后大坑，係天后站行幾分鐘就見到
一啲都唔難搵，見到依條咁有特色嘅樓梯就知點樣上樓上鋪頭啦
而家大坑分店做緊兩個推廣，第一樣係任食30分鐘沙白、而第二樣就係玩搖骰贏奬品
奬品好豐富嫁，只要有兩個同骰就立即有奬
眼見其他客人都中到獎，但自己就中唔到獎就特別傷心
不過唔緊要，今日黎係為左食野嫁嘛
海鮮拼盤
首先我同朋友點左個海鮮拼盤試下先
蝦🦐同埋醬油蟹同我之前係韓國食嘅有得比
證明依度海鮮冇得彈！
所以睇完3款餐牌後，我決定點最貴嘅釜山塔 $568
一於試晒依間鋪頭最好食嘅海鮮
四款前菜無限任食，酸酸辣辣好開胃
30分鐘無限任食沙白
店員唔會因為無限任食，就特登每次比勁少你
而係真係會倒滿成個鍋
店員仲會細心咁比個漏斗客人計時，服務態度一流
韓國啤酒 $28
等緊嘅時候，梗係要同朋友啤一啤
啤酒充滿清甜芒果味，好容易入口
嘩，終於食得啦
沙白全部都洗得好乾淨，唔會有沙
又唔會有好重海水味，一字記之日：正
然後終於到今日嘅主角登場啦
九重海鮮塔，黎到嘅時候我同朋友都嘩嘩聲
因為真係太壯觀啦
第一層：泡菜和牛卷
用泡菜包住和牛黎食就唔怕和牛嘅肉汁流走，更可以解解膩
而和牛肉質就非常之滑嫩
第二層：蟶子
食到超新鮮嘅蟶子真係好開心
咬落口個陣好有口感，唔會咬極都咬唔入
第三層：元貝
啲汁太過多的話，可以流落去下層粥
唔會浪費元貝本身應有嘅鮮味
第四層：海蝦
唔洗調味都已經食到鮮味，蝦頭仲要有好多蝦膏添
第五層：龍蝦
全晚我最鐘意就係龍蝦，因為真係超大隻
仲長過我隻食指，並且啖啖肉，食落去個陣成個人都好爽
第六層：美尾龍躉指天翅
絕對係游水龍躉黎，我自己最鐘意食無骨嘅魚嫁啦
第七層：沙巴肉蟹
蟹蓋有超多蟹膏，並且蟹腳又係啖啖肉
肉質又唔乾身，唔會有好霉
其實睇相都知，連埋上幾層仲有刀蚌、象拔蚌、北寄貝幾款海鮮
第八層：厚切黑椒牛脷&花膠魚片串
好少有機會食到蒸嘅黑椒牛脷，感覺好新鮮
而包住花膠嘅魚片口感有少少似魚蛋，十分彈牙
第九層：南非鮑魚&日本南瓜&日本番薯&粟米
用大隻鮑魚作結，並且有唔少蔬果幫助消化
梅酒 $98
等緊最後粥底嘅時候點左支梅酒黎飲
有三粒梅黎帶出甜味，令依支酒唔會太苦
連女仔都鐘意飲
韓式豬手湯底
送上兩張對比圖，你就知粥底係幾咁足料
除左韓式豬手之外仲有韓式年糕添
如果食唔晒更加可以叫店員幫你打包拎返屋企做消夜或者第二朝嘅早餐
總結而言，今餐真係大滿足
食到咁多好食嘅海鮮，真係不枉我點最貴嘅set，原全值回票價
加上店員殷勤嘅服務態度，令我同朋友都有賓至如歸嘅感覺
