拿拿混完醬就落單，超肚餓。
呢度主打靚料火鍋，除左一般沙嗲麻辣蕃茄湯底，仲有較貴價嘅材料例如四格鍋、佛跳牆鍋、鮮蟹魚湯鍋，最正最正一定係濃湯佛跳牆雞翅鍋，好多人食過呢款湯底都讚，有budget或者人多真係要點
刺身、小食唔少得，火鍋配料都有海鮮、牛肉除左本地手切牛，仲有聽到都流哂口水嘅日本和牛肉眼A5級！其餘配料都齊備例如丸、餃、滑、蔬菜。
好快落左單，上湯底嘅時候店員都好小心，而且提醒我地可以等鍋滾起先飲淡湯，再打邊爐。
一打開煲蓋，不得了，講真，如果人少少，飲完湯，食埋湯料，真係飽左6、7成。成煲佛跳牆好有睇頭，首先有翅、鮑魚、花膠、海參、螺片、金華火腿、雞，非常豪華，落料唔手軟
鮑魚新鮮有彈性
螺片柔軟！
花膠食極都仲有，真心足料，女士一定鐘意。
海參
呢個湯底雞湯味濃郁，唔會太杰身，淡淡都係精華，我地飲左好多碗！不得不提金華火腿，你睇幾多。
雞件又係足料，兩個人差少少淨係食個鍋都飽。
好似我地咁鐘意食牛，又諗唔到點邊樣，就大多數會點呢個胡爐牛拼盤。
一份有齊5款牛肉，包括牛舌芯、手切安格斯肥牛、極上手切牛頸脊、牛胸爽同霜降牛粒
牛舌芯爽脆。
手切安格斯肥牛脂肪均勻，入口軟嫩
牛頸脊肉味較濃，口感結實。
牛柳粒都好味，食落juicy，唔會韌。
如果鐘意牛胸爽，真係要試試，入口油花爆發，口感好爽架。
其實食到呢度已經幾乎飽，好在唔係點左太多野。紫菜響鈴又係呢度必食，即炸架，新鮮脆口，就咁食都已經好正
鮑魚蝦餅王足料！
因為我地唔知道原來佛跳牆鍋入面，本身已經有好多娃娃菜，所以點左兩款菜，油麥菜同萵筍都好夾雞湯。
