緣聚鮮鍋 (Closed)

都有一排冇嚟到荃灣， 呢日行完千色店就走去隔離大鴻輝度睇下有咩食， 喺樓下見三樓有火鍋放題食， 印像中呢間舖應該係新開冇幾耐， 見價錢都係二百蚊左右到一個人， 幾合理所以就入去試下， 等位嘅時候店員就會問你揀邊一款湯底， 所以各位去之前就要諗好， 餐廳面積好大， 相信差不多有300個座位， 座位都幾乾淨企理。餐廳大約八點鐘嘅時候， 就會有壽司師傅劏吞拿魚， 對於大約200蚊放題嚟講比較少見。餐廳地方好大， 有多個自助區例如火鍋配料， 餐前小食， 沙律， 飲品， 雪糕和甜品， 有少少去咗食自助餐咁嘅感覺。火鍋類別我哋揀咗個比較特別嘅黑蒜湯底， 幾香黑蒜油味， 湯底偏清， 火鍋配料嘅牛肉的油脂分佈都幾靚， 200蚊任食嚟講算唔錯， 仲有海鮮都係可以任叫。見出面有壽司師傅即劏吞拿魚，當然要攞啲刺身試下， 吞拿魚好鮮甜， 肉質同平時唔係即劏嘅好唔同， 其他刺身都好新鮮。總結呢間餐廳都算係平， 二百蚊有咁多選擇， 而整體嘅食物質素都唔差， 抵食。