Wingman (Closed)

由細到大我都好鍾意食雞翼，今日終於嚟到以雞翼做主題嘅Wingman，一間已經mark咗好耐嘅餐廳🤭餐牌有19款雞翼可以選擇，眼花撩亂，除咗放題之外仲可以單點雞翼。最後我同朋友揀咗兩款，分別係黑椒檸檬同巴馬臣芝士蒜蓉口味。雞翼依然保持到肉汁，唔會太乾身，肉質都算滑既。黑椒檸檬🍋雞翼入口係淡淡的黑椒味，然後就係強烈嘅檸檬酸味，都幾刺激味蕾👅巴馬臣芝士蒜蓉呢款雞翼以蒜味為主，係鹹味嘅雞翼，芝士唔會太搶味，有輕輕點綴嘅作用。杏仁麵包糠炒西蘭花苗我同朋友都幾鍾意呢款配菜👏🏻有解膩作用。而且蔬菜炒得唔會太乾身，質地有少少濕潤，係我鍾意嘅口感。加埋杏仁麵包糠，味道更加豐富，唔會單單剩係得蔬菜嘅原味。炸蓮藕好似薯片零食咁樣，不過如果有多啲唔同嘅調味料就更好。飲品嗌咗一杯Rosy Lemonade，比想像中清爽，唔係好化學人工嘅玫瑰味，甜度適中。