玄鮨 (Closed)

過得黎銅鑼灣去利園望下，正所謂唔買都睇下呀，難得過到黎，梗係附近食餐好既先配得起今日既行程。上到黎玄鮨，識食一定選omakase ！前菜係門鱔，炸白蝦， 雞泡魚皮，最讚係炸白蝦，非常香脆，炸得乾身冇油膩感。呢份刺身附有三款醬汁，首先左口魚邊配最底既酸汁，鰹魚刺身配中間既蒜蓉豉油，另外有金目鯛，深海池魚，拖羅，刺身都係最時令新鮮。特別要講下剝皮魚剌身，包住中間既係魚肝，食落除左魚生既鮮甜，仲有魚肝既creamy， 層次好豐富。螺肉食落就好爽脆，沙甸魚肉質再實淨一些，有好甜既魚味。天婦羅有鮑魚、粟米、青椒、帶子，上面係新鮮海膽，再配綠茶鹽。天婦羅粟米好有驚喜，一D都唔乾，粟米仍然爽脆多汁。蟹膏豆腐，除左上面肉眼見得到既蟹膏同蟹腳，豆腐食落每一啖都完全滲透住蟹膏既味道，好濃郁，好好味！海膽、赤鯥、象拔蚌、牡丹蝦、池魚、燒拖羅壽司，新鮮好食，尤其燒拖羅，輕輕燒左表面，食落好香，再加上油脂係口中爆發，正！松茸肚皮茶碗湯，茶壺仔好靚，個湯清淡得黎，有好濃郁既松茸香。最後仲有甜甜密瓜，芒果同桃，完美句號！