聚點坊點心專門店 (Moved) New Location

這裡係同事介紹，說水準不錯，週未既下午，黎試下。小試兩款腸粉，黃沙豬潤腸同米網黃金腸。腸粉皮厚度還算適中，未算太滑，跟腸粉專門店堂記比較還是明顯地比下去，餡料方面，豬潤切得薄薄一片，食落尚算粉嫩。米網薄脆，由腸粉皮包住，滑加埋脆，相比炸兩，呢個米網腸係升級版。糯米雞，而家多數係賣珍珠雞，糯米雞真係唔係到到有，又試下呢到。糯米軟硬適中，食落幾爽，料亦足，夠多。不過飯味同料味明顯分開，無哂糯米雞，飯同料混合既威力。蝦蛟，睇落細細粒，蝦幾爽，對我黎講，我收貨。雪山叉燒飽，一拎上手夠哂熱，熱得有點燙，夠熱的飽點，心諗應該唔會差得去邊，面頭既墨西哥皮鬆化，少甜，配埋熱辣辣都係少甜既叉燒餡，甜度剛好，果然不錯，驚喜的係個底脆脆地，這裡的雪山叉燒飽很不錯。仁稔蒸排骨，鼓汁以外的選擇，排骨用上的偏肥，穩陣。鳳爪係個人喜好，喜歡帶點辣味既鳳爪，這裡的無咩辣味。馬拉糕質地鬆軟，不過一夾好似發寶膠咁一粒粒散開，相對失色，不過食落輕甜，唔係只有鬆軟沒有味既馬拉糕，這裡的也收貨。其實很少到點心店，見樓下食家都以名店作比較，尚未有緣幫襯名店，對我黎講，這裡夠大路夠穩陣的，有驚喜的就只有雪山叉燒包。