增輝大排檔都係第一次！
增輝一直在小菜王隔離，真係一直被本人忽略！完全睇唔到增輝嘅存在！
原來增輝榮獲「米芝蓮」評級！真係失敬失敬！
「增輝菜館」對面就係「增輝藝廚」，都係同一間食肆，只係名字有啲令人混淆。
夜晚嘅石硤尾街選擇坐喺「增輝」門外，大排檔當然要坐門外先夠風味啦！
員工態度表現得好親切，:)算係窩心意外收穫。
餐牌菜式好多選擇，樣樣都好似好吸引，樣樣都好想試！
結果都係揀了三個小菜～
油鹽水煮蜆
1
蜆雖然唔係好大隻，但意外地隻隻都好新鮮，冇一隻係壞蜆！蜆肉肉質嫩滑，清甜！蜆湯亦好清，油鹽比例剛剛好！粉絲吸收曬湯嘅精華，加有芹菜嘅青香，簡單嘅材料，已經可以做出好好嘅味道。
椒鹽九肚魚
賣相好吸引，濃濃嘅椒鹽蒜香味，非常惹味！
第一次食到去魚頭、開肚嘅九肚魚！之前食開都係連頭成條炸，但去頭開肚可以令到魚肉更入味！
九肚魚外酥內滑，油炸嘅時間拿捏剛剛好，盡顯大廚功架！好好味！
如果有椒鹽田雞嘅話，一定一定更吸引
。紅燒斑腩煲
魚、豆腐、菜係必備材料，每款都好好味，斑腩啖啖肉，只係略嫌係將煮好咗個菜式先放入個鐵煲度，有失去煲仔菜嘅意義。
白飯都煮得唔錯，飯粒軟熟、分明。
好美味嘅一餐晚餐！以後會繼續支持！
