Day and Nite by Master Kama (Closed)

小弟終於考完所有試喇！為咗慶祝呢個天大喜訊，一於今次去食豪啲，去食龍蝦！話說旺角山東街有一間專食龍蝦嘅西餐，今次就同大學同學試試！上到去，餐廳唔算好大，不過勝在坐得夠舒服，又夠光猛。呢度主打龍蝦，我哋一定要試下，第一個我地叫嘅就係龍蝦芝士，我呢個芝士迷一見到芝士就會發顛，呢個龍蝦芝士除咗有複製隻大龍蝦鉗同芝士之外，下面仲有啲長通粉，長通粉連埋啲芝士一齊食，因為通粉索哂芝士汁，真係好好味！下一款真係堅啊！叫龍蝦匯，入面有半隻烤蒜蓉牛油龍蝦、一個龍蝦包同一個龍蝦雜錦海鮮石鍋湯烏冬。其實呢個set好抵食，一隻龍蝦有三種唔同嘅食法，燒龍蝦原汁原味；龍蝦包好特別，因為平時食開牛肉做餡，今次好高級喔！個湯烏冬又可以食到龍蝦嘅鮮味，大家一定要叫呢個！平時我好中意食玉子燒，今次呢個龍蝦玉子燒又點可以唔叫啊！玉子燒中間用咗龍蝦肉做餡，外面玉子又甜又嫩，無得彈！除咗龍蝦之外，我哋都試咗兩款串燒，分別係燒雞泡魚乾同燒安格斯牛柳，兩樣都燒得好香好脆，唔錯！最後叫杯Pineapple Mint Tea，成個晚餐就perfect啦！中意食龍蝦嘅你哋記得要試試喇！