平時我係好少係香港食日本餐，因為武漢肺炎搞到冇得去日本食好嘢，所以而家疫情一緩和，冇辦法之下就喺香港搵啲日本餐廳試吓。見到呢間係另一度book位有半價優惠，同埋見其他食評話食物水準新鮮，仲有香港好少日本餐廳有咁多海鮮選擇，所以就黎試下。.
呢度環境好似去左日本咁，因為少人，服務都好好，但就有一啲食物缺貨，冇龍蝦同海膽。不過仲有好多選擇，所以都ok。半價優惠有啲拼盤不適用，同埋飲品都不適用，而且每人要叫一杯飲品。.
講返食物啦，啲人講到一定要食佢必食嘅蟹膏甲羅燒，我就可能期望太大，最後就覺得同韓國蟹膏醬冇太大分別，只係多咗少少蟹籽蟹肉。第二個期待嘅就係毛蟹鍋，真係好鮮甜呀個蟹，食完蟹同蔬菜，最後有專人會用個蟹湯黎煮稀飯，期待以為好似出面食九層蒸海鮮下面啲粥咁，點知味精蓋過蟹味，好鹹，浪費左啲蟹鮮味。之後仲叫咗其他鮑魚扇貝虎蝦，每樣都有專人親自燒，全部真係好食好新鮮。海鮮食唔飽嘅，所以都要叫下其他，叫咗個鰻魚飯同天婦羅都唔錯。.
整體黎講，價錢半價左之後都仍然好貴，大約每人280蚊，但其實自己係屋企整海鮮食都好麻煩，呢度有專人幫你燒海鮮，舒舒服服有日式嘅海鮮餐食都好滿足，叫左杯梅酒，當自己去左兩個鐘日本啦
