Harvest House

又一個禮拜做到個人散晒，放工最想就係搵啲嘢食嚟療癒自己。今次嚟到銅鑼灣嘅「家賀屋」，見佢哋做緊優惠，諗住試吓。估唔到真係有驚喜！啲海鮮好多都係日本直送，品質好高，但價錢又好抵。
我哋試咗個活伊勢龍蝦刺身，肉質超爽彈，味道好鮮甜，完全食得出佢嘅新鮮。另外，火炙左口魚裙丼都好正，油脂豐富，入口即溶，真心好食。飲酒方面，佢哋全日生啤都半價，真係抵到震，配埋啲燒物，好似汁燒免治雞軟骨棒同埋炙燒北海道魷魚條，真係好夾。呢間餐廳嘅性價比真係好高，好啱我哋呢啲打工仔放工嚟放鬆吓。